見大家share篇《窮撚朋友問我：D樓點樣賣架？》，好多朋友仔有D 錯愕同灰，令我記返起我第一次喺售樓處，當時我個心都好似坐過山車咁離一離。
有D comments，或者我回應一下…
--> 有關聯名買樓
我有提及大陸人唔聯名買樓，可以慳雙倍印花稅，而港人因為都冇機會再買樓所以聯名。事後有人問候我母親，表示聯名係想同伴侶分享財產，而唔係考慮印花稅嘅問題，聯名係愛嘅表現。
=.=，點解要滾搞到我母親呢，我冇否認你好撚愛你老婆，想同老婆分享財產。不過我印象中八兩金都表現到好撚愛范冰冰，但八兩金會將完整嘅愛意送比范冰冰。如果各位男人只送50%嘅業權比你老婆，而你老婆都好撚愛你呢，請你好好珍惜你老婆，因為世界上有D 老婆係要100%嘅業權先feel 到你對佢嘅愛意架。
--> 有同行話：「邊有咁誇張呀，自從有雙倍印花稅同買家印花稅，一手樓主要都係香港用家主導，近一年黎買樓嘅人，本地人同內地人各佔一半啦。」
一半係唔係屬於「好撚多」？呢個大家自己思考啦。如果公司一個月發配你返邊疆，去大陸做野15 日，你覺得多唔多呢？
另一個點解我覺得有大陸人「好撚多」嘅原因，亦同樓盤嘅價錢有關，印象中低過400萬嘅樓好少，800萬以上嘅樓好多， 800萬以上嘅樓有幾多香港普通人買到呢？大家又思考下。
--> 有人熱烈討論SSD，BSD， DSD
唔知係咩好正常架，因為炒樓個D 人先要知架渣。我地會叫個D 冇買過樓，冇物業喺手嘅香港人做「處」，呢個TERM係好膠，但真係形容得好貼切，因為首次買樓嘅人真係好pure好true。
《窮撚朋友問我：D樓點樣賣架？》
親戚朋友知道我喺「大公司」做野，必定問我兩條問題。第一條係「你買樓有冇得平？」第二條就係「係咪真係咁多大陸人嚟香港買樓？」。第一條我印象中答左一億次，係「原來沒有，從來都沒有」。至於第二條問題，唔係好多大陸人，係「好撚多」。
今日同應該一世都買唔到樓嘅窮撚們(我當然係其中一個啦)，講下賣樓實況。每次講賣樓實況，朋友仔都話：「唔好再講啦，來生不做香港人，嗚呀...」，受唔到刺激嘅朋友仔睇到喊唔好話我。
※※※※※※※※※※※※※※※※※※※※※
每次喺售樓處，我都會問：「今日唔洗錢呀又？」無論個盤喺邊，幾錢，都好多人買，有幾人山人海？好似年宵最後割價咁多人。
「一群大陸佬又嚟到售樓處啦...」
● 大陸佬未飄到埋嚟，就知佢係大陸佬，嗰啲覺得自己係范冰冰嘅大陸女人，隔離實有個八兩金咁嘅打扮嘅平頭裝男人。一日內我會唔止一次見到同一個范冰冰同八兩金，因為佢一日買兩層。同一個樓盤，分多日發售，第二日都會見到同一個范冰冰同八兩金，我心入面完全係吳君如家有喜事個句：「又係你呀，陳生！」。范冰冰同八兩金唔想知份約講咩，佢買樓多過你買橙。
● 八兩金同范冰冰唔會經過銀行財務counter問按揭，因為幾千萬層樓佢地都會full pay。
● 八兩金同范冰冰態度係咪特別差，去米蘭站買手袋佢地都格衰衰啦，何況買樓？佢地嘅脾氣當然係「豈止於大」啦。佢地永遠唔會睇住自己個仔，佢地個仆街仔就好似恆星咁喺人逼逼嘅售樓處自轉同公轉。你會發現全世界最有愛心嘅必定係地產agent，佢地會「愛心不止一百次」咁看住個仆街仔。
● 而你會發現全世界最有語言天份嘅一定唔係劉家傑，無論個大陸佬係四川人，上海人定哈爾濱人，個agent都會好似德成女傭咁表示：「佢都係我同鄉」。
● 八兩金唔會同范冰冰開心share聯名買樓，因為八兩金會同范冰冰每人一層，慳雙倍印花稅。
● 買家印花稅有效壓抑大陸炒家？ Are you kidding me？八兩金同范冰冰都有香港身分證，點解會有，呢樣你問下特區政府點解實施乜膠投資移民，優才計劃。
※※※※※※※※※※※※※※※※※※※※※
香港人買到樓，我每次都想企起身拍手掌恭喜佢地架...
● 香港人有幾想上車？只有香港買家會叫我地幫佢地影底簽約個個magic moment。只有香港買家買完樓會散發「財散人安樂」嘅氣息，簽個名無哂成副身家都開心到好似岩岩拎完諾貝爾和平獎咁開心。
● 只有香港買家諗都唔諗就決定聯名，夫婦買，或者一家買都聯名，佢地知聯名再買樓要比雙倍印花稅，都唔會care，因為今生今世都唔慌有機會買第二次樓。
● 只有香港買家會無哂成副身家，仲會去銀行財務counter申請按揭，冇哂錢之餘再借落一身債。
● 亦只有香港買家會「問題天天都多」咁問律師費，管理費，收樓保養會所天花景觀實尺，因為真係會住入去。
※※※※※※※※※※※※※※※※※※※※※
見到D 大陸佬買樓買到好似買橙咁，自己連窮人恩物都買唔起，仲填緊份仆街form抽居屋，我真係好想問 annual dinner 點解公司唔係拎層樓出來抽，TBB 台慶都抽碧桂園啦。如果annual dinner 抽樓，我覺得我會發奮圖強囉。
PS. 喺度想同冇買樓經驗嘅朋友仔講，買樓嚟講，你要知道嘅必定比佢比你知道嘅多好多好多，帶個顯微鏡去睇份約，你就會發現你永遠都輸比「大公司」架啦。
Search